Sonntag, 12. Juli 2015

Als der Pfleiderer no jong war.



Also manchmol denk i grad, dass i jetz doch äfangä ald werd. 
Do iberkomnd mi dann so a Gfiel, so a ganz a melancholischs. 

Ond no sitz i so uff meinerä Terass, do em diäfschdä Niederbayrischä ond griag a wengele Hoimweh. 

Ned dass'er denggäd s'gfelld mer ned dohannä, aber d'Wurzlä send hald ned an der Donau, dia send hald doch am Nägger. 

Ond no muass i drä denggä, wiä i als gloiner Bua henderm Haus von der Oma ond em Oba, schdondälang uff deäm Mirrabellabaum gkogged bee ond Mirabellä gfressä han, bis mer dä Ranzä weh doä hod. 

Wissed'er, do en der Graubäschdross, glei näbem 'Radio Fischer'.
On hendä, wo der Baum gschdandä isch, do ischs nonder gangä zom Sulzbach.
Recht schdeil is gwäe ond voll mid Brennesslä. 

Aber des hod ons ned gschdeerd, nonder grudschd semmer drotzdeem. 

Ond em Sulzbach semmer romgschwanzd, bis mer von obä bis ondä dreggig ond nass wahred.
Oimol, dees woiss i no guad, do hemmer em Sulzbach Zeh ond Knochä vommä Bär gfonda, grad wia diä wo mer beim Schualausfluäg end Bärähöle gsäe hend. 

Hend mir a Freid gket. Bis mer äfangä gmergd hen, dass se do vom Schlachthof dä Dreck oifach dä Bach na glassä hen. 

Jo, ond mein Kapf derf i ned vergässa. Was hemmer do älles ägschdeld.
Mid em Daschämesser Heggäseile abgschnidda ond no grauchd. Ond schbäder hemmer ons am Kapf mid de Mädle verabräded so wiäs au der Vadder ond der Oba scho gemachd hend. 

Schbäder no, hen meine Leid on i uff em aldä Lendähof gwohnd. Em Wender semmer mit de Gleidschuä end Schual na gfahrä ond am Middag wieder nauff glaufä. 
Ond bis end Wasserfallkurv hemmer mit Blaschdigguggä a Schliddäbäh baud ond send emmer wieder nonder ond nauff, ganz ohne an Lifd. 

Mein Vadder hod mer amol a Tischtennispladdä end Garage nei gschdelld. An derrä hend mer em Sommer gschbield bis end Nachdem nei, schdondalang. 

Ohjeh wenmer do äfengd zom verzehlä, do kennd mer grad weidermachä  bis es von aloi uffherd. 

Aber jetzt her I uff, bevor i eich no zdod langweil mid meim Gschwäds. 

Jaaaja, I han amol en Oberndorf gläbd...  ond no grad schee isch gwäa. 

Oins sag i eich,
Dahoim isch mer ned do, wo mer Sachä zom ledschdä mol machd.
Au ned do, wo mer dia Sachä am meischdä gmachd hod.
Dahoim isch mer do, wo mer diä meischde Sachä zom erschdä mol gmachd hod... 

Der erschde Bleedsinn,
Den erschtä Kuss,
Der erschde Rausch,
Es erschde eigene Geld verdeaned ,
Dä erschde Sex gked

Vergessed dees Jo ned!

Keine Kommentare: